Recursos materiais

Na Universidade de Vigo destaca o Centro de Investigacións Mariñas (CIM) e a Estación Científica Mariña de Toralla (ECIMAT), integrada en redes europeas como EMBRC, que proporciona acceso a instalacións e servizos avanzados en ciencias mariñas. Disponse tamén de equipamento de última xeración para estudos xeolóxicos e oceanográficos, un sistema experimental de observación mariña e un novo buque oceanográfico. Outros centros relevantes son o CINBIO (biomedicina e nanotecnoloxía) e o CACTI, con grandes equipos de análise científica.

A Universidade de Santiago de Compostela conta coa Estación de Bioloxía Mariña da Graña (EBMG), creada para promover e facilitar a investigación e a docencia en bioloxía mariña, así como o asesoramento e a difusión de temas relacionados coa fauna e flora mariña de Galicia. Conta ademais cos recursos, materiais e servizos da EDIUS, dos servizos xerais da USC, das facultades, escolas ou centros onde o/a doutorando/a realice as súas actividades e dos grupos de investigación que participan nas distintas liñas do programa.

A Universidade da Coruña ofrece servizos de apoio á investigación (SAI), formación transversal, orientación profesional e axudas á mobilidade. A UDC conta co Instituto de Estudos Marítimos, o Instituto de Medio Ambiente e o Instituto de Estudos Europeos, directamente relacionados coas áreas do programa de doutoramento DOMAR. Ademais, o Centro de Innovación Tecnolóxica en Edificación e Enxeñaría Civil está dotado de tecnoloxía única en Europa e alberga grupos de investigación que estudan aspectos da construción, a enxeñaría hidráulica e sanitaria, as estruturas portuarias e costeiras.

A Universidade de Aveiro conta co Centro de Estudos Ambientais e Mariños (CESAM), que reúne diversos equipos de investigación en oceanografía física, xeofísica e xeoloxía mariña, ecoloxía mariña e estuarina, produción primaria, microbioloxía mariña e biotecnoloxía, e conta co apoio do Centro de Innovación e Sostibilidade da Economía do Mar (ECOMARE), que inclúe un centro de experimentación e promoción da acuicultura mariña e un centro de investigación e rehabilitación de animais mariños. Ademais, o Instituto de Telecomunicacións e o Instituto de Enxeñaría Electrónica son unidades de investigación no campo da electrónica e as comunicacións que poden enmarcar proxectos de doutoramento cun compoñente tecnolóxico nestas áreas.

A Universidade de Minho conta con dous campus universitarios: Gualtar en Braga e Azurém en Guimarães, cun total de 11 centros (8 escolas e 3 institutos). Integra diversos centros de investigación, destacando no ámbito do programa o Centro de Bioloxía Molecular e Ambiental, o Grupo de Biomateriais, Biodegradables e Biomiméticos, o Centro de Enxeñaría Biolóxica e o Centro Interdisciplinar de Tecnoloxías de Produción e Enerxética. Tamén integra dous laboratorios asociados: o Instituto de Biotecnoloxía e Bioenxeñaría (IBB) e o Instituto de Nanoestruturas, Nanomodelado e Nanofabricación (I3N). Conta cunha unidade de apoio á mostraxe no mar, equipada cunha embarcación semirríxida de 7,5 m, e equipamento avanzado para a recollida de mostras biolóxicas e sedimentos.

A Universidade de Trás-os-Montes e Alto Douro integra o Centro de Investigación en Tecnoloxías Agroambientais e Biolóxicas, o Centro de Química, o Centro de Ciencias Animais e Veterinarias e o Centro de Xenómica e Biotecnoloxía. Estes centros contan con equipos multidisciplinares de investigadores docentes e non docentes en áreas de investigación tan diversas como a ordenación e xestión do territorio, xestión de ecosistemas acuáticos, biodiversidade, biotecnoloxía, reprodución animal e vexetal, acuicultura e ecotoxicoloxía, entre outras áreas de interese para o ciclo de estudos. Estes centros, xunto co Parque Tecnolóxico Régia Douro Park, apoian actividades de I+D e transferencia de tecnoloxía, acollendo grupos do campo interdisciplinar das ciencias químicas, biolóxicas e ambientais.

A Universidade de Porto conta co Centro Interdisciplinar de Investigacións Mariñas e Ambientais, o Centro de Investigación en Biodiversidade e Recursos Xenéticos, o Instituto de Bioloxía Molecular e Celular, o Instituto de Enxeñaría de Sistemas e Informática e o Instituto de Ciencia e Innovación en Enxeñaría Mecánica e Enxeñaría Industrial.