Observación do Océano e Cambio Global

O océano desempeña un papel central na regulación do clima e dos ciclos bioxeoquímicos globais. Dende a Revolución Industrial, este papel sufriu importantes alteracións que teñen un gran impacto no seu funcionamento: o quecemento global asociado ao incremento da concentración de gases de efecto invernadoiro na atmosfera terrestre provocou cambios significativos na circulación de materia e enerxía do océano. Ademais, e no contexto do cambio global, prevese un incremento do nivel do mar entre 40 e 80 cm para o 2100 (IPCC, AR6, 2021), o que terá importantes implicacións sociais xa que preto dun 50% da poboación mundial vive na zona costeira. Os océanos actúan tamén como provedores de servizos e recursos de enorme transcendencia para o desenvolvemento das poboacións humanas. Por todo isto, mellorar o coñecemento sobre o océano e o seu funcionamento é crucial no futuro desenvolvemento da humanidade, sendo a observación do océano un paso clave nesta dirección que xa aparece integrado nos principais programas internacionais de investigación e xestión ambiental.

Observación do océano

Liña 1.1: Oceanografía Física. Estudo da circulación oceánica de gran escala e costeira, incluíndo masas de augas, mareas, entre outros fenómenos oceanográficos, con base en diferentes métodos de observación e de análise.
Liña 1.2: Oceanografía Química. Estudo dos ciclos bioxeoquímicos, a síntese de produtos naturais, o estudo da materia orgánica no océano, a contaminación química, o ciclo dos nutrientes, os gases efecto invernadoiro e a interacción océano-atmosfera.
Liña 1.3: Oceanografía Xeolóxica. Estudo da morfodinámica costeira, a paleoclimatoloxía, paleoecololoxía, paleontoloxía, bioestratigrafía e paleografía, a estratigrafía, sedimentoloxía, gas, a evolución das marxes continentais, o vulcanismo.
Liña 1.4: Oceanografía Biolóxica. Taxonomía e ecoloxía do plancto, bentos e necton dende a zona intermareal aos mares profundos, o estudo das cadeas tróficas, a produción primaria e secundaria, os ciclos de vida, a dinámica das poboacións, a bioxeografía e as especies invasoras.

Sistemas e Tecnoloxías para a observación do océano

Liña 1.5: Teledetección. Engloba dende o desenvolvemento de sensores ao procesado do sinal, patróns de recoñecemento, análise de imaxes satelitais, espectroscopia.
Liña 1.6: Redes de Observación. Inclúe a oceanografía operacional, a análise de series temporais, plataformas de monitoraxe autónomas, a intelixencia artificial, radares de alta frecuencia e aboias oceánicas.
Liña 1.7: Equipamentos e sensores. Desenvolvemento de plataformas de monitoraxe autónomas, intelixencia artificial, radares de alta frecuencia e aboias oceánicas.

Cambio global

Liña 1.8: Impacto sobre a costa, hidrografía e dinámica dos océanos. Estudos sobre o incremento do nivel do mar e o seu efecto na costa, da temperatura, variacións na salinidade, modelos numéricos preditivos e estudos temporais, entre outros.
Liña 1.9. Impacto sobre os ciclos bioxeoquímicos. Análise do efecto do cambio global nos ciclos do carbono, nutrientes, no metabolismo, a produción primaria, respiración.
Liña 1.10. Impacto sobre a biodiversidade. Dende fitoplancto e zooplancton, a organismos bentónicos e peláxicos, dende poboacións a comunidades, especies invasoras, con especial énfase no seu seguimento e modernización.
Liña 1.11. Impacto sobre as redes tróficas. Análise das alteracións das redes tróficas mariñas debidas ao cambio climático. Como os cambios na temperatura, salinidade, etc., alterarán a estrutura das cadeas tróficas (número e tipo de especies e/ou interaccións entre especies) debido ao impacto diferencial que estes cambios terán na dispoñibilidade de alimento, hábitat, depredadores, etc. dos seus compoñentes.
Liña 1.12. Impacto sobre os recursos explotables. Organización rexional das zonas pesqueiras, globalización e dereitos sobre os recursos, acordos bilaterais e multilaterais de explotación, avaliación zonas pesqueiras e marisqueira, dinámica de poboacións explotables.
Liña 1.13: Avaliación legal e económica do cambio global. Impacto macroeconómico do cambio climático, reformas nas taxas e impostos ambientais, políticas sociais, efecto do quecemento global na explotación de zonas pesqueiras, servizos e valor dos ecosistemas, efecto da erosión costeira nas áreas de interface terra-mar, instrumentos e políticas de mitigación e adaptación ao cambio climático.