O obxectivo desta orientación é deseñar e desenvolver sistemas e modelos que permitan situar ás empresas do sector mariño e marítimo entre as máis avanzadas tecnoloxicamente e competitivas nun contexto internacional Así, as empresas deste sector da rexión de influencia do Campus do Mar, deberían ser pioneiras na adopción de solucións tecnolóxicas novas para a xestión e a produción, que poidan ser exportadas ao resto do mundo. Isto suporía non só un impulso para a eficiencia e a competitividade das empresas do sector do transporte marítimo, a pesca, a acuicultura, a transformación ou a construción naval por pór algúns exemplos, senón tamén para as empresas do sector tecnolóxico que poidan explotar nun ámbito internacional as ideas e produtos desenvolvidos baixo a protección dunha patente. O sector marítimo comprende actividades moi diversas: deseño e construción de todo tipo de buques, plataformas e artefactos navais; desenvolvemento de equipos para instalación en buques; transporte marítimo; infraestruturas marítimas, en particular os servizos portuarios e explotación dos recursos mariños, incluíndo a operación de artefactos navais dedicados á pesca, á acuicultura e á extracción doutros recursos do mar. Estas actividades xogaron historicamente un papel estratéxico na actividade económica da rexión e, aínda que en moitos casos como na construción naval, existe unha tradición de liderado tecnolóxico, é necesario trasladar este rol a outros campos de actividade do sector. Esta orientación inclúe liñas de investigación cuxos resultados poidan achegar un valor engadido en diferentes ámbitos dos procesos de extracción e transformación de recursos alimentarios mariños, potenciando a calidade e seguridade dos alimentos que se producen e reducindo os custos de produción.